Policia italiane është vënë në kërkim të 27-vjeçarit Kristjan Mëhilli, i cili u arratis nga burgu, gjatë natës së ndërrimit të viteve.
Mëhilli po kërkohet në zonën e Piemontes, ndërsa ka nisur një hetim edhe për administratën e burgut, lidhur me arratisjen.
Donato Capece, sekretar i përgjithshëm i sindikatës së policisë së burgjeve, e cilësoi ngjarjen të paralajmëruar pasi tha se prej kohësh siguria e brendshme e burgjeve është cënuar nga mungesa e stafit dhe e fondeve.
Mëhilli akuzohej si pjesë e një bande që kishte kryer grabitje vilash, përfshi këtu edhe atë të Ricardo Coppo, një sipërmarrësi i njohur i verërave nga Monferrato, duke marrë para dhe sende me vlerë për rreth 40 mijë euro.
“Nëse nuk më çon tek kasaforta do të qëlloj”, ishte kërcënimi që shqiptari i kishte bërë sipërmarrësit, të cilit gjatë grabitjes i është drejtuar disa herë armën në kokë.
Anëtarët e bandës, mes të cilëve dhe Kristian Mëhilli, u arrestuan nga policia italiane në maj të vitit 2019, ndërsa për kapjen e tyre u përdorën tektikat ushtarake, për shkak se vlerësoheshin si persona me rrezikshmëri të lartë.
Mëhilli dhe anëtarët e tjerë akuzoheshin për një seri vjedhjesh në vilat luksoze të zonës së Piemontes dhe Lombardisë.
Mëhilli së bashku me një të dënuar tjetër shqiptar kanë pritur natën e ndërrimit të viteve për të vënë në jetë një plan që me siguri e kanë studiuar prej disa kohësh.
Në orët kur të gjithë po festonin vitin e ri, dy të burgosurit u arratisën nga burgu i Vercellit, duke sharruar hekurat dhe duke përdorur çarçafët me të cilët kanë zbritur nga kati i katërt.
Por njëri nga dy të burgosurit nuk arriti të arratisej, pasi theu krahun dhe u kap brenda rrethimit të burgut.
Mëhilli arriti të arratisej, falë edhe disa bashkëpunëtorëve që e prisnin në makinë pranë burgut.
