“Unë jam me fat. Të paktën kam mundur të largohem dhe shpresoj të filloj një jetë të re” thotë Miraq Popal një shtetas afgan i cili me familjen e tij është strehuar në Lezhë pasi u larguan nga Afganistani.
“Washington Post” i dedikon një shkrim shtetasve afganë që u detyruan të largohen nga Afganistani pas marrjes së pushtetit nga talebanët dhe të vendosen në vende të ndryshme të botës.
Mes intervistave që sjell prestigjiozja amerikane është edhe një familje afgane e strehuar në Shqipëri.
Popal ka aplikuar për një vizë në Kanada dhe po pret ende një përgjigje dhe nuk ka dëgjuar që ndonjë afgan të jetë larguar nga Shqipëria.
Në Lezhë familja e tij jeton në dy dhoma, ku njëra është shndërruar në kuzhinë dhe tjetra në dhomë gjumi.
“Kjo është jeta, duhet të pajtohesh me të”, thotë Miraqa Popal për Washington Post.
Në Shqipëri prej 4 muajsh punon si redaktor titrash ndërsa në Afganistan punonte për TOLONEWS, kanali më i madh i lajmeve në Afganistan.
“Washington Post” shkruan se Shqipëria po strehon përkohësisht 2400 afganë që ikën nga vendi i tyre për shkak të sundimit të talebanëve, teksa janë në pritje për t’u vendosur në një vendbanim të përhershëm.
