Detaje të reja raportohen lidhur me vrasjen e 35-vjeçarit Albi Bashaliu, ngjarje e ndodhur mëngjesin e sotëm në fshatin Gjocaj të Peqinit.
Nga raportimet mësohet se viktima ishte në një lokal pak minuta para ngjarjes, ndërsa dikush e ka thirrur nga jashtë. Në momentin që ai ka dalë në ambientet e jashtme të lokalit, është qëlluar me armë zjarri, ku një nga plagët e kishte në kokë.
35-vjeçari ka humbur jetën menjëherë, ndërsa pak metra nga vendi i ngjarjes autorët e dyshuar, i kanë vënë zjarrin edhe një automjeti, për të cilin u tha në fillim se i përkiste viktimës, më pas u raportua se i përkiste autorëve.
Ngjarja ndodhi rreth orës 08:40, ndërsa trupi i tij u gjet i pajetë në mes të rrugës.
Bashaliu, është një emër i njohur për policinë. Ai në vitin 2017, u arrestua për një atentat të dështuar ndaj dy personave. 35-vjeçari akuzohet se qëlloi me breshëri arme ndaj dy personave që udhëtonin me makinë. Në atë kohë dy personat shpëtuan pa lëndime ndërsa Albi Bashaliu u arrestua.
Një ndër pistat që po hetohet është ajo e hakmarrjes që lidhet me të shkuarën e viktimës dhe vëllait të tij, i cili ndodhet në burg, pasi në qershor 2021 vrau një bashkëfshatarin e tij.
