Kryekomisioneri Shtetëror për Zgjedhjet, Ilirjan Celibashi, në një intervistë për RTV Ora shprehet se ka ardhur koha që politika të hartojë një kod të ri elektoral. Ai tha se Kodi i ri do të jetë më efiçent se sa të arnohet çdo vit i vjetri.
Sipas Celibashit edhe ligji i Dekriminalizimit duhet të rishikohet, që çështja “non grata” të specifikohet më qartë për të mos i lënë vend interpretimeve.
“Mendoj se është më mirë një kod i ri zgjedhor, pasi ky që kemi është arnuar zgjedhje pas zgjedhje. Do të ishte mirë një kod i ri”, tha ai.
Duke marrë shkas nga ndryshimet e fundit, Celibashi kërkon nga politika që në këtë tryezë KQZ të ketë një rol aktiv, që të mos mbetet vetëm para faktit të kryer.
Ndryshe nga PS, Kryekomisioneri nuk mendon që ë Shqipëri nuk është ende koha që partitë politike të mos jenë fare të përfshira në administrimin zgjedhor.
“Ka ardhur koha që partitë të mos kenë kaq të drejta në raport me procesin zgjedhor, por akoma jo totalisht të shkëputura nga procesi”, shtoi ai.
Përveç kodit zgjedhor, sipas Celibashit duhet të rishihet edhe ligji i dekriminalizimit, pasi për çështjen e “non grata” nuk duhet të lënë me hapësirë për interpretim.
KQZ mendon se pretendimet e palës humbëse pas çdo procesi zgjedhore nuk do të marrin fund as me ndryshimet dhe as me kodin e ri.
