Një person është arrestuar nga policia e Lezhës pasi në banesë i është gjetur armë zjarri pa leje. Në pranga është vënë 21-vjeçari Ardit Luli, i cili akuzohet edhe si “përkrahës” i personave që hyjnë të armatosur në një lokal në Lezhë disa javë më parë.
“Mbi bazën e informacioneve të siguruara në rrugë operative se shtetasi Ardit Luli mbante armë pa leje në banesë, në fshatin Pllanë, Lezhë, kanë ushtruar kontroll në banesën e tij. Gjatë kontrollit të ushtruar në banesën e këtij shtetasi, shërbimet e Policisë kanë gjetur dhe sekuestruar 1 armë zjarri automatik me 2 krehëra dhe 132 fishekë luftarak. Në përfundim të veprimeve hetimore, specialistët për Hetimin e Krimeve në Komisariatin e Policisë Lezhë bënë arrestimin në flagrancë të shtetasit: Ardit Luli, 21 vjeç, banues në fshatin Pllanë, Lezhë, me precedentë të mëparshëm kriminal”, njoftoi policia.
“Gjithashtu, nga veprimet hetimore dyshohet edhe si përkrahës i autorëve të ngjarjes së ndodhur në datën 13.11.2021, në një lokal në Zejmen-Lezhë, ku hynë të armatosur disa persona të maskuar, të cilët janë identifikuar dhe shpallur në kërkim”, shtuan të njëjtat burime.
Vijon puna për dokumentimin e plotë të veprimtarisë kriminale të shtetasit Ardit Luli, dnërsa materialet hetimore u referuan në Prokurorinë e Rrethit Gjyqësor Lezhë, për veprime të mëtejshme, për veprën penale ‘Armëmbajtja pa leje’”, mbyllet njoftimi i bluve.
