Ben Blushi, ish-Drejtor i Top Channel, ka reaguar pas publikimit të pagës së tij mujore. Emri i tij ndodhej në data basen, krahas emrave të mbi 637 mijë qytetarëve, të cilëve në rrjet iu publikuan disa të dhëna sensitive, përfshi edhe pagat.
Blushi në reagimin e tij mediatik shprehet se paga e tij është 24 herë më e vogël nga sa pretendohet në dokument, ndërsa referuar data bases, ai rezultonte me një pagë prej 247 milionë lekë. Me këtë pagë, Blushi rezultonte ndër personat më të paguar, por ai e mohon një pagesë të tillë.
Blushi është kujdesur që sqarimin ta bëjë në respekt të bashkëpuntorëve të tij, duke u shprehur se “në kompaninë ku kam punuar deri përpara tre javësh, dua të them se rroga ime është 24 herë më e vogël se ajo që pretendohet se është”.
Të dhënat e publikuara kanë krijuar një pasiguri te qytetarët, ndërsa Prokuroria e Tiranës ka nisur verifikimet. Po kështu Ministria Financave ka paralajmëruar se do të bëjë kallëzime penale, sikundër një seri institucionesh kanë bërë thirrje që këto të dhëna të mos publikohen.
Ky është skandali i dytë brenda pak muajsh, pas atij të patronazhistëve, ku të dhënat e mbi 1 mln shqiptarëve u publikuan në prag të zgjedhjeve. SPAK nisi një hetim lidhur me këtë skandal, por çështja u mbyll, ndërsa patronazhistët u morën në mbrojtje nga Kryeministri, i cili nuk kurseu elozhet për ta. Tashmë nuk dihet se çfarë do të ndodhë me hetimin lidhur me skandalin e fundit, i cili duket se iu shtua përplasjeve politike, por edhe aferës së inceneratorëve, e cila po hetohet nga SPAK, ndërsa është arrestuar ish-ministri Lefter Koka.
