Lista e pagave e 630 mijë personave qarkulloi dje në përmes rrjeteve sociale, një ngjarje që u cilësua një skandal.
Komisioneri për Mbrojtjen e të dhënave Personale, Besnik Dervishi ka theksuar se ngjarje të tilla ndodhin në të gjithë botën. “S’po e justifikoj atë që ka ndodhur, do presim konkluzionet e hetimit por mund t’ju sjell shembuj që kanë ndodhur edhe në Itali ku janë marrë të dhëna dhe janë përpunuar të dhëna të zgjedhësve,” tha Dervishi.
Në lidhje me skandalin e të dhënave të qytetarëve shqiptarë, ku u bënë publike edhe pagat ka reaguar Drejtoresha e Agjencisë Kombëtare të Shoqërisë së Informacionit (AKSHI), Linda Karçanaj.
Sipas saj, ngjarje të tilla ndodhin edhe në Amerikë, duke sjellë rastin e Edward Snowden apo Wikileaks.
“Ju e dini mirë se çdo shtet sot përballet me kërcënimin e sigurisë kibernetike nga sulmet e jashtme, detyrë të cilën deri më sot AKSHI e ka kryer me sukses si dhe nga ndërhyrjet e brendshme të individëve që kanë akses në sistemet dixhitale,” tha ajo.
