Lulzim Basha deklaroi këtë të Martë se Edi Rama meriton dhe do shpallet person “non grata” nga SHBA.
“Edhe më i dëshpëruar është Edi Rama, por sepse e di që trekëndëshi do të merret me radhë. Kur bie baza do të bien edhe brinjët e trekëndëshit të Bermundës. Prandaj dje panë një “non grata” dhe një që pret të shpallet “non grata” në sinkron të plotë para godinës së kryeministrisë. Elementet kriminale nuk po i përdor vetëm Rama dhe Meta, por edhe Sali Berisha. Ata janë bashkë për ta mbajtur Shqipërinë kështu siç është, por nuk është plaçka e tyre. Është atdheu i gjithë shqiptarëve, dhe ne do të bëjmë të mundur që çdo shqiptar ta gëzojë këtë vend të bekuar, por të vjedhur nga kjo treshe e korrupsionit, babëzisë dhe papërgjegjshmërisë politike”, tha Basha në një konferencë për mediat nga selia blu.
“Nuk do lejojmë që një ‘non grata’ të bëjë gjithçka t’i zgjasë jetën politike një tjetër personi që pret të zgjidhet ‘non grata’ dhe meriton të shpallet ‘non grata’ si shumë të tjerë”, deklaroi Basha më tej.
I pyetur nga gazetarët, çfarë provash ka për deklaratat se kryeministri Edi Rama do shpallet “non grata”, Basha tha: “Nuk kam asnjë provë, por Rama po sillet si dikush që ka frikë të shpallet ‘non grata’”.
