Alban Hoxha as ndaj Kukësit nuk ishte në stolin e Partizanit. Kapiteni është dëmtuar prej më shumë se një muaji e gjysmë. Ai ka pësuar një frakturë në gishtin e vogël të dorës dhe nuk ka mundur të luajë një ndeshje zyrtare, që nga ajo ndaj Egnatias më 31 tetor.
Prej javësh gardiani është kthyer të stërvitet me duar dhe prej ditësh ai ka marrë pjesë në minindeshjet e ekipit në stërvitje, madje duke treguar formë të mirë dhe duke u bërë “mur” i pakalueshëm për sulmuesit e të kuqve.
Trajneri Ilir Daja është shprehur se Hoxha nuk do të luajë titullar deri kur Teqja të gabojë. Gjithsesi, as kaq nuk ka mjaftuar që Alban Hoxha të jetë të paktën në stol ndaj Kukësit.
Madje, portieri nuk ka udhëtuar me ekipin sepse nuk ishte as në tribunë në këtë ndeshje, siç ka ndodhur edhe në rastet e tjera kur Hoxha ka munguar, madje edhe në ndeshjet e luajtura në Tiranë.
Fakti që gardiani është rikuperuar dhe nuk është as në stol për të mbështetur ekipin të paktën nga ana emocionale, madje as në tribunë, krijon jo pak dyshime për diçka më tepër se dëmtimi i pësuar i kapitenit.
E shkuara na ka mësuar se koha do të tregojë gjithçka, por mungesa e Hoxhës në derbi do të ishte paksa e dhimbshme për të dhe tifozët, sepse gardiani nuk ka munguar në asnjë ndeshje të tillë dhe ka qenë një faktor mjaft i madh i rekordit pozitiv të të kuqve ndaj Tiranës, që kryeson renditjen dhe është ekipi për t’u mundur këtë sezon.
