Nga BoldNews.al
Gjyqtari i Tiranës Besnik Hoxha bëri një përpjekje të fundit për t’i shpëtuar fytyrën (literalisht) Mirel Mërtirit, pak ditë para se Prokuroria e Posaçme SPAK të gërvishte pak skandalin e inceneratorëve në Shqipëri.
“Boldnews.al” u dënua për shpifje nga gjyqtari Hoxha, për faktin se publikoi foton reale të biznesmenit kontrovers Mërtiri, me disa zyrtarë të lartë në Zimbabve, të arrestuar apo të dyshuar për një aferë 60 milionë dollarë me kompaninë zvicerane të një personi shqiptar, të identifikuar si “Ilir Dedja”.
Raportimet e medias afrikane i vendosën emrin “Ilir Dedja” personit Mirel Mërtiri. Redaksia e “Boldnews.al” publikoi këtë skandal dhe Mirel Mërtiri përdori gjyqtarin Besnik Hoxha dhe prokurorin Isa Jata për të tentuar t’i mbyllë gojën medias, nëpërmjet gjobitjes për “Shpifje”.
Pra, gjyqtari Hoxha u kujdes shumë për fytyrën e Mërtirit.
Po tani, që SPAK-u, më në fund, bëri një lëvizje të vogël, por gjithësesi të mjaftueshme për të zbuluar fytyrën e vërtetë të sipërmarrjes së inceneratorëve, a do të kujdeset gjyqtari Besnik Hoxha të mbrojë sërish fytyrën e Mirel Mërtirit?
Nëse do të eci me të njëjtën logjikë që ndoqi për redaksinë e “Boldneës.al”, gjyqtari Hoxha mund të marrë nën gjykim penal prokurorin e SPAK-ut, Klodian Braho.
Ky i fundit, megjithëse pa shumë forcë, dhe, siç besojnë edhe shumë analistë, i nxitur nga “urdhëra politikë” për të trajtuar dosjen e inceneratorëve, nxori urdhër arresti për Lefter Kokën, si edhe Klodian Zoton e Stela Gugalljan, përkatësisht ortak në biznes dhe njerëz të familjes së ngushtë të Mirel Mërtirit.
Për këtë të fundit, SPAK nuk ka njoftuar zyrtarisht se e ka shpallur në kërkim, megjithëse raportime mediatike e deklarojnë diçka të tillë.
Pavarësisht nëse Mërtiri është ose jo në kërkim, emri i tij është i përfshirë aq shumë në skandalin financiar të inceneratorëve, saqë edhe nëse Klodian Braho nuk lëviz më shumë, sërish ai është personazh i diskretituar publikisht në këtë aferë.
Pra, fytyra e Mirel Mërtirit është sërish në rrezik, ashtu siç u ndje nga raportimet korrekte të “Boldneës.al”.
Ndaj, nuk do të jetë aspak çudi që ai të kërkojë pastrimin e fytyrës së tij tek gjyqtarë si Besnik Hoxha e prokurori Isa Jata.
A do të jenë në gjendje këta personazhe të sistemit të drejtësisë që t’i dalin sërish në mbrojtje fytyrës së Mirel Mërtirit?
A do të guxojnë që të dënojnë për “Shpifje” prokurorët e SPAK-ut, njëlloj siç vepruan me redaksinë mediatike?
A do të mjaftojnë paratë e inceneratorëve për t’i dhënë sërish guxim gjyqtarit Besnik Hoxha të mbrojë atë që duket në dritën e diellit?
