Lulzim Basha komentoi këtë të Enjte në emisionin “Open” deklaratën e Sali Berishës, i cili paralajmëroi protestë më 25 Dhjetor, ditën kur Presidenti serb Vuçiç vjen në Tiranë.
Duke iu përgjigjur interesimit të gazetarëve në studio, Basha tha: “Të gjithë e dimë që Vuçiç ka qenë në Tiranë dhe Rama në Beograd, pse e bën tani Berisha thirrjen, se është patrioti më i madh ndër ne? Vuçiç ka qenë në Tiranë, papritur Berisha po rrëmben flamurin… Po ai do vijë prapë se prapë. Vuçiç dhe Rama janë të lidhur në një pakt jodemokratik, emetojnë vlerat e Vladimir Putin”.
I pyetur për “Open Balkan”, Basha tha se “është një sajesë e Ramës dhe Vuçiç që unë i konsideroj gangsterë politikë, një frazë që e ka përvetësuar dhe Berisha, njerëz që i kanë ikur detyrimeve të Procesit të Berlinit, CEFTA-s, për të shpikur atë që është konsideruar në publikun serb – bota serbe”. Ai shtoi se “Open Balkan” është një “projekt destabilizues për Ballkanin”. “E vetmja gjë që mund ta ndryshojë është njohja e Kosovës nga Serbia. Më pas vendet mund të kyçen ku të duan”, shtoi.
Ndërsa për atë që është konsideruar “projekt i ndarjes së Kosovës”, Basha tha se ka qenë i pari që e ka kundërshtuar zyrtarisht.
“Unë mund të mos i bie daulleve si disa, por qëndrimin e parë zyrtar dhe të dokumentuar me presidenten e atëhershme të Kroacisë e kam mbajtur unë sikur e kam mbajtur edhe në takime të tjera zyrtare si me zotin Bilt. Për herë të fundit e kam ngritur në takimin me Escobar. Pasi e kam diskutuar 20 minuta e ka shprehur dhe para medias”, tha Basha.
