Në prag të transfertës ndaj Crystal Palace, trajneri i Southampton, Ralf Hasenhuttl, ka dalë në konferencën e zakonshme për shtyp, ku ka folur për gjendjen e të dëmtuarve dhe ka drejtuar gishtin nga sulmi.
Tekniku austriak ka pranuar se skuadra ka treguar që mund të bëjë ndeshje të mira, por çalon jo pak në finalizim dhe ka kërkuar nga të tijtë që të shënojnë më shumë gola.
“Ne kemi treguar se mund të bëjmë ndeshje shumë të mira, por ajo që na mungon, është disi finalizimi. I kemi mundësitë të bëjmë shumë më mirë, pasi kemi sulmues cilësorë në ekip. Për ndeshjen ndaj Crystal Palace nuk do të kemi Che Adams, teksa Broja dhe Armstrong nuk janë në formën më të mirë, por besoj që do t’i kemi në dispozicion”, deklaroi trajneri austriak.
Armando Broja u dëmtua në ndeshjen ndaj Arsenalit dhe u zëvendësua rreth 20 minuta para fundit të takimit, teksa ende nuk dihet nëse do t’ia dalë të nisë nga fillimi sfidën me Crystal Palace, e planifikuar për nesër në mbrëmje./Syri.net
