Ish-ministri i Drejtësisë, Ylli Manjani, thotë se nga dita e sotme drejtimin e PD-së e merr në dorë Komisioni i Rithemelimit dhe Lulzim Basha nuk është më kryetar.
Anëtarët e këtij Komisioni, tha Manjani për Task Force me Sonila Meçon në Syri Tv, shkojnë direkt në zyrat e PD-së.
“Sipas vendimeve të Kuvendit, nuk ka asgjë tjetër në jetën organizative se sa një komitet drejtues, komisioni i përkohshëm.
Ai është zoti i PD-së: shkruan, vulos, përfaqëson PD në marrëdhëniet me të tretët. Organizon jetën e brendshme, drejton çdo gjë.
Ai komision shkon direkt në zyrat e PD dhe fillon punën.
Se kush rri në zyrë e kush jo, kjo është çështje e rojes së PD-së.
Kush do t’i ndalë ata? Kanë marrë një mandat për të drejtuar PD-në në të gjitha aspektet e PD dhe për të përfaqësuar PD. Këtu është i mbyllur diskutimi. Nëse duam të krijojmë anë tjetër, kjo është logjikë përplasje, hajde të gjejmë se kush është më i forti”, tha Manjani.
Prezencën e policisë përreth selisë së PD, Manjani e quan logjikë përplasje.
“Nëse disa uzurpatorë mendojnë se do t’i ruajë 24 orë në 24, Policia e Shtetit që ka lënë shtetin për punët e partisë. Logjika është që Kuvendi ka marrë vendime dhe ato vendime duhet të zbatohen”, u shpreh Manjani.
