Drejtori i Përgjithshëm i Policisë së Shtetit, Gledis Nano, ka njoftuar se do të ketë një ritestim të analizave të testeve të drogës për të gjithë efektivët e policisë.
Nano, në një deklaratë për mediat pas konferencës vjetore për kanabisin, u shpreh se mund të ketë analiza gabim, ndaj do të ristesohen të gjithë dhe në fund do të bëhet një bilanc i plotë për këtë nismë në radhët e uniformave blu.
“Dua të informoj se policia nuk ka patur synim që të terrorizoj forcat e policisë, ata kanë mbështetjen time personale dhe të ligjit për punën që ata kryejnë. Testi i drogës do të kryhet sipas procedurave dhe ne nuk do të marrin asnjë veprim nëse nuk do të jemi të bindur se ata janë përdorues të drogës. Nuk ka përfunduar testimi, qëllimi ynë është parandalimi i përdorimit të drogës. Testimi do të vijojë nga institucionet e tjera. Duam një polici të pastër dhe kjo bëhet për një arsye më të fortë, për të krijuar besueshmëri në nivelin më të lartë tek publiku”, tha ai.
