Është mbyllur në barazim pa gola pjesa e parë mes Dinamos dhe Teutës, sfidë e vlefshme për javën e 12-të të Kategorisë Superiore.
Dominim thuajse i plotë i Teutës gjatë 45 minutave të para, me raste të shumta para portës dinamovite por pritjet e Bakajt kanë zgjidhur situatat e vështira.
Rasti i parë erdhi në minutën e 10-të. Emiljano Vila gjen hapësirën në krahun e djathtë për të gjuajtur nga jashtë zonës, Bakaj devijon në këndore.
Vetëm 8-të minuta më vonë Bakaj, shpëton përsëri Dinamon. Një kundërsulm i shpejtë i Teutës nxjerr Gjorgiev të vetëm para portierit por ky i fundit ndalon me këmbë gjuajtjen e sulmuesit.
Në minutën e 29-të, Gjorgiev shfaqet para Bakajt dhe gjuan, portieri bën mrekullinë me grushtim. Lorenco Vila vjen me shpejtësi në krahun e djathtë dhe gjuan duke e gjetur në kundërkohë portierin por topi kalon pasqyrën e portës dhe përfundon jashtë.
