Drejtori i përgjithshëm i Partizanit, Olsi Rama, ka qenë i ftuari sot në “Sport News” ku ka bërë analizën e sezonit të deritanishëm ët të kuqve. Në intervistën e tij për News 24, Rama ka shpjeguar gjithçka edhe rreth planeve të së ardhshmes së të kuqve.
Starti i Partizanit – “Nuk i shoh statistikat dhe nuk e dija që do ishte starti më i keq i Partizanit që nga kthimi në elitë, megjithatë sigurisht që nuk isha i kënaqur me rezultatet dhe as me lojën e shprehur deri diku. Duke u nisur nga ajo që bëmë vjet, këtë sezon bashke me stafin dhe trajnerin Daja, u përqendruam që të afronim lojtarë që të plotësonin grupin e lojtarëve, duke zëvendësuar edhe lojtarët, që kishin ikur në verë dhe kishim objektiv të merrnim edhe më të mirë se ata. Gjithsesi duhet shumë kohë për të ndërtuar një skuadër, sesa ajo kohë që të jepet. Duhet të përgatitesh për kupat Europës dhe pastaj shtimet e lojtarëve vijnë në momentet e fundit sepse e tillë është merkatoja e klubeve shqiptare. Dihen vështirësitë. Me gjithë situatën e krijuar, ngulëm këmbë bashkë me presidentin të vazhdonim ashtu siç e kishim nisur, me durim dhe me shumë punë nga ana e ekipit për të kaluar atë që unë e quaj më shumë krizë psikologjike se tekniko-taktike të ekipit, duke mos marrë në përfundim, atë që shprehtë në fushë sepse ka pasur ndeshje kur kanë luajtur mirë, por nuk kanë marrë rezultatet e duhura”.
E ardhmja e Dajës – “Bashkë me presidentin Demi ngulëm këmbë të vazhdonim me këtë projekt teknik duke besuar te aftësitë e Dajës dhe duke besuar se ekipi do arrinte të shprehej në mënyrën e duhur. Futbolli është i bukur sepse nuk është shkencë ekzakte dhe t’i nuk merr ndonjëherë atë që meriton, por që në fund të fundit çfarë të mbjellësh, do të korrësh. Ne presim me kujdes duke ujitur çdo bimë të mundshme që kemi në ekipin tonë që të japë lulet dhe frytet e veta. Besuam te trajneri Daja, nuk ka nevojë të flas për aftësitë e tij, gjithashtu edhe ai vetë ka një integritet moral të lavdërueshëm. I ka marrë edhe ai përgjegjësitë e veta dhe kemi bërë edhe diskutime të hapura me njëri-tjetrin për mënyrën sesi ta kalojmë këtë periudhë.
Ftohje me Dajën – “Nuk mund të ndërhyj në çdo gjë, mua më intereson të vazhdojë punë. Më intereson të kem marrëdhënie të mira, jo vetëm me Dajën, por edhe me ndihmës trajnerët dhe trajnerin e portierëve apo menaxherët e ekipit sepse po nuk u kuruan të gjitha, nuk merr dot rezultate. Nuk e fituam ndeshjen me Teutën në gjashtë minutat e fundit, ne luajtëm për ta fituar atë ndeshje gjatë gjithë kohës dhe në fund u shpërblyem dhe morëm atë që nuk e kishim marrë prej një viti. Kisha kohë që thosha si nuk shënojmë dot një herë në fund, shënuam dy dhe ishte një çlirim. Mundohem të jem i ftohtë, por ka momente që të rrëmben emocioni i garës dhe për mua ishte një shpërthim shumë i bukur”.
Durimi me trajnerin – “Nuk është kompliment që Partizani nuk ka qenë i duruar me trajnerët. Ne e ndërtuam skuadrën edhe në bazë të vizionit të trajnerit, kështu që pak a shumë duhet t’i japim kohën të bëjë atë që ka bërë me ekipet e tjera dhe vjen me ekipin tonë. Vjet pati një avantazh që kampionati nisi në nëntor, këtë vit nisi më herët. Kaluan dhjetë javë, nuk jemi aty ku duhej. Kampionati shqiptar është i veçantë në sensin që luan katër herë me një ekip, kështu që nëse duhet të marrim ekipin e Tiranës, që është 9 pikë larg, po t’i fitojmë tre ndeshjet e mbetura me ta, aty jemi dhe Partizani e ka treguar se e bën këtë, nuk e ka problem këtë gjë”, tha ndër të tjera Rama.
