10 vite burg kërkoi sot prokuroria për Andrea Memollarin, 20-vjeçarin që në korrik të vitit 2016 shtypi për vdekje me makinë qitësen Dhurata Prifti, teksa po kalonte rrugën me dy fëmijët e saj të mitur.
Aksidenti tragjik ndodhi në kryqëzimin afër Arkivës së Shtetit, në kryeqytet. Autori i aksidentit nuk ndaloi, por kaloi me makinë sipër trupit të viktimës dhe u largua. Ai u arrestua më vonë nga policia.
Memollari, 20 vjeç, ishte përdorues droge dhe kishte pasion makinat e shtrenjta dhe shpejtësinë. Madje ai në vitin 2015 ishte dënuar me punë në komunitet për dhënie ryshfeti ndaj një polici rrugor.
Pas pretencës së prokurorisë ka reaguar bashkëshorti i viktimës. Arjan Prifti ka kërkuar drejtësi dhe dënimin maksimal që parashikon ligji për ngjarje të tilla për Memorralin. “Fëmijëve të mi ju vra nëna para syve si në Siri. Jam prind i plagosur por nuk merrem me hakmarrje. Nëse ai nuk dënohet maksimalisht, e drejta në këtë vend ka marrë fund. Çdo shqiptar e çdo prind do dënimin maksimal të Memollarit”, tha ai.
