Drejtori i Policisë së Shtetit, Gledis Nano foli për Klodian Çalamanin këtë të Mërkurë, në komisionin parlamentar të sigurisë. Nano tha se pas lirimit nga qelia nga Çalamanit në vitin 2009, ndaj tij nuk ka pasur kallëzime apo informacione si person i dyshuar për abuzime seksuale apo dhunë në familje.
Por, tha po ashtu se, për të ka pasur të dhëna se ka pasur aktivitet kriminal në drejtim të vjedhjes së banesave, bagëtive dhe shpendëve në fshat. Informacione këto, që sipas tij, ishin në fazë verifikimi.
“… nga këto ngjarje mund të veçojmë ngjarjen e ndodhur në 16.11.2021 ku në fshatin Grecalli të Bashkisë Fier u arrestuar në flagrancë shtetasi Klodian Ccalamani, sepse për motive të dobëta në banesën e tij, në fshatin Grecalli, ka vrarë me sende të forta shtetasin e mitur M.V., të cilin ishte groposur në oborrin e banesës. Autori rezulton një person i evidentuar nga policia si person me precedentë, pasi gjykata e kishte dënuar me 4 vite burg për veprën penale ‘Heqja e paligjshme e lirësisë’, ‘dëmtime të tjera me dashje e kryer në bashkëpunim’, dhe është liruar nga IEVP Rrogozhinë në datën 6 Gusht 2009 për plotësim të kohës së vuajtjes së dënimit. Ndërkohë për këtë shtetas ka pasur të dhëna se ka pasur aktivitet kriminal në drejtim të vjedhjes së banesave, bagëtive dhe shpendëve në fshat. Informacione që kanë qenë në fazë të verifikimeve. Për autorin, pas përfundimit të dënimit të mësipërm, nuk ka pasur informacione, të dhëna apo kallëzime si person i dyshuar për abuzime seksuale dhe dhunës në familje”, tha Nano.
