Një ngjarje e rëndë u zbulua sot në një apartament në zonën e Golemit, ku u gjetën të pajetë dy persona, Mihal Jani dhe Anila Llulla, përkatësisht 60 dhe 50 vjeç.
Ngjarja ka ndodhur në apartamentin e katit të dytë të një pallati në rrugën “Bulevardi i Pishave” në Golem.
Dyshimet janë se dy viktimat janë asfiksuar nga gazi, por nuk dihet nëse ka pasur një rrjedhje të tij për shkak defekti, apo një hapje të qëllimshme.
Hetimet pritet të zbardhin ngjarjen, ndërsa dyshohet se ata humbën jetën 24 orë para se të gjeheshin të pajetë.
Policia njofton se ngjarja u zbulua në rreth orës 17:45. Shtëpia ishte e 60-vjeçarit Mihal Jani, ndërsa Anila Llulla banonte në Tiranë. 60 vjeçari e përdorte apartamentin ku u gjetën pa jetë si shtëpi pushimi. 50-vjeçarja ishte larguar nga shtëpia e saj në Tiranë 2 ditë më parë.
Djali i saj, kishte denoncuar largimin ditën e djeshme, ndërsa Anila Llulla ishte larguar nga banesa me datën 25 nëntor.
Edhe djali i Mihal Janit gjatë ditës së djeshme, por edhe sot, i binte telefonit të të atit, por ai nuk përgjigjej. Kësisoj ai shkoi gjatë pasdites në shtëpinë e 60-vjeçarit, por sërish askush nuk iu përgjigj teksa i ra derës.
Në pamundësi për të bërë diçka ai kërkoi ndihmën e zjarrfikëses e policisë dhe kur u futën në shtëpi i gjetën të pajetë.
