Ambasadorja holandeze, Dewi Van de Werd, duke folur nga qyteti i Korçës, tha se 2017-ta është një vit i mundësive të mëdha sa i takon risive që do të sjellë reforma në drejtësi në vendin tonë.
Gjatë një takimi në Gjykatën e Korçës, ku ndodhej lidhur me transparencën dhe rëndësinë e reformës në drejtësi, Van de Werd tha se është domosdoshmëri rritja e kredibilitetit të drejtësisë për qytetarët.
“Ky vit do të jetë një vit i mundësive të mëdha sa i takon risive të reformës në drejtësi. Qytetarët dhe politikanët kanë pasur vullnet për miratimin e reformës. Në 2017 do të fillojë zbatimi i saj dhe kjo është tepër e nevojshme për të gjithë popullin”, tha Werd.
“Reforma është një shtysë edhe për anëtarësimin në BE”, në kuadër të luftës kunder korrupsionit dhe krimit të organizuar, shtoi ajo.
“Qëllimi final i kësaj reforme është që në Shqipëri të mos ekzistojë më ideja që dikush mund të jetë i paprekshëm. Si ambasadë jemi përfshirë që në fillim në reformën në drejtësi, duke dhënë ekspertizën tonë”, tha ajo.