8 njerëzit më të pasur në botë kanë në duart e tyre një pasuri të barazvlefshme me atë të gjysmës së njerëzve më të varfër të planetit. Ky është përfundimi i raportit të publikuar nga “Oxfam”, vetëm pak orë përpara se elita e biznesit dhe udhëheqësit botërorë të mblidhen për Forumin Ekonomik të 2017-s në Davos të Zvicrës, që nënvizon se hendeku mes të pasurve dhe të varfërve është shumë më i thellë nga sa ishte menduar deri tani, raporton BBC.
“Ne kemi një sistem ekonomik të deformuar, i cili duket i krijuar në mënyrë të tillë që të përfitojë vetëm 1% dhe jo 99 për qind e njerëzve. Për këtë arsye krijohet edhe ky numër miliarderësh, të cilët kanë të njëjtën pasuri me atë të gjysmës së botës”, tha Matthew Spencer, “Oxfam”.
Raporti me titull “Një ekonomi për 99%” tregon në mënyrë të detajuar sesi mbeten pas më të vobektit në ekonominë globale.
Sipas Shoqatës britanike të Bamirësisë, pabarazia ekonomike së bashku me ndjesinë e përjashtimit nga përfitimet e globalizimit kanë kontribuar në rebelimet politike të vitit 2016, ku përfshihet vendimi i Britanisë për t’u larguar nga Bashkimi Europian dhe triumfi i Donald Trumpit në presidencialet e Amerikës.