Nga Boldnews.al
Një gjyqtar në pritje të Vetingut, Besnik Hoxha dhe një prokuror që e kaloi Vetingun në mënyrë të dyshimtë, Isa Jata, ishin në unison që të shpallnin fajtor redaksinë e “Boldnews.al” për “shpifje” ndaj “njeriut incenerator”, Klodian (Mirel) Mërtiri, për shkak të disa publikimeve për një skandal financiar në Zimbabve, me burim median e vendin afrikan.
Për “personin hije” pas biznesit qindra milionë euro të landfilleve, i cili nuk e ka pasur aspak problem që të vendosë të gjithë qeverinë nën këmbët e tij, nuk ishte aspak e vështirë për të “blerë” një gjyqtar e prokuror, ndaj të cilëve ekzistojnë shumë akuza publike për përfshirje në korrupsion.
Megjithatë, sado të blihen disa zyrtarucë apo edhe disa të tjerë me peshë më të madhe, e vërteta është diçka që nuk ka çmim.
Dhe, në rastin e inceneratorëve, “Boldnews.al” ka thënë disa të vërteta, madje më tepër se shumë e shumë të tjerë, të cilët fërkojnë duart e barkun kur media gjendet nën presionin që u ngjan formave mafioze.
Shumë shkurt se përse Mirel Mërtiri ndihet i fyer nga “Boldnews.al”.
Në Qershor 2020, disa media kryesore në Zimbabve, me publikimet e tyre në gjuhën angleze, raportojnë për një skandal financiar me vlerë rreth 60 milionë euro, për blerjen e materialeve kundër Covid-19.
Në atë skandal, që dërgoi pas hekurave Ministrin e Shëndetësisë së atij vendi dhe disa persona të tjerë të botës së biznesit e sekserë, gjendej i përfshirë edhe shtetasi shqiptar “Ilir Dedja”, i prezantuar si pronar i kompanisë “Drax Consult”, me seli në Zvicër.
Mediat në Harare (kryeqytet i Zimbabves) publikuan edhe një foto, në të cilën gjendej Presidenti i atij vendi, ministri i shëndetësisë i arrestuar, sekseri financiar dhe shtetasi “Ilir Dedja”.
Në fakt, “Boldnews.al” e identifikoi se shtetasi “Ilir Dedja” në foto ishte Mirel Mërtiri dhe kjo ishte hera e parë që fytyra e tij shfaqej publikisht.
Në të gjithë artikujt e publikuar nga “Boldnews.al” cilësohet gjithmonë fakti që shtetasi Mirel Mërtiri është prezantuar si shtetasi Ilir Dedja në shtetin e Zimbabve pasi në artikujt e publikuara në mediat shumë prestigjoze të këtij vendi, këto të fundit i referoheshin Mirel Mërtirit si Ilir Dedja.
Pas këtyre publikimeve, Mirel Mërtiri ngre një padi penale për ‘Shpifje” ndaj redaksisë së ‘Boldnews.al”, duke pretenduar se ai nuk është i përfshirë në skandal financiar dhe se ai nuk është Ilir Dedja.
Në bazë të kësaj padie, prokurori Isa Jata, i cili në proceset me të dëmtuar akuzues ka një rol “shtojce” pa vlerë, kërkoi dënimin e redaksisë.
Gjyqtari Besnik Hoxha miratoi gjithçka dhe shpalli fajtor redaksinë, duke e vlerësuar fytyrën (në foto) të Mirel Mërtiri me 100 mijë lekë.
I gjithë procesi gjyqësor është një shëmti, tipike nga ato që ka prodhuar e ashtëquajtura Reformë në Drejtësi.
Gjyqtari dhe prokurori nuk u ngritën në nivelin e intelektit mesatar, për të ndërtuar disa pyetje të thjeshta, para se të merrnin vendimin e tyre.
– Gjyqtari dhe prokurori, në funksion të dhënies së drejtësisë, nuk patën asnjë interes se përse i ofenduari Mirel Mërtiri ishte në një takim në Zimbabven e largët, pikërisht me personat e arrestuar për “korrupsionin 60 milionë dollarë”;
– Gjyqtari dhe prokurori, në funksion të dhënies së drejtësisë, e anashkaluan tërësisht faktin që Mirel Mërtiri nuk dha asnjë shpjegim shterues se përse gjendej në atë foto dhe përse emri i tij ishte “ngatërruar” me atë të “Ilir Dedjas”.
– Gjyqtari dhe prokurori, në funksion të dhënies së drejtësisë, nuk e konsideruan aspak të arsyeshme që të saktësonin se përse fytyra e Mirel Mërtirit ishte vendosur “gabimisht” si “Ilir Dedja”, një emër saktësisht i ngjashëm me një tjetër personazh tërësisht anonim, i cili herë pas here shfaqet si “ortak”, “bashkëpunëtor” apo “administrator” në rrjetin e kompanive të landfilleve.
Gjyqtari dhe Prokurori, natyrisht, e kishin shumë të thjeshtë të vendosnin nën akuzë median.
Këtyre zyrtarucëve “të drejtësisë së re të tredhur”, në fakt, edhe nuk u vihet shumë faj që e vendosin veten si letër pastruese për fytyrën (në foto) të Mirel Mërtirit.
Ata e shohin se ky personazh detyron tre banka që të mos i përgjigjen Komisionit Hetimor Parlamentar që është ngritur pikërisht për hetimin e tij dhe të tjerëve në “aferën e inceneratorëve”.
Kur tre banka përkulen para këtij personi, çfarë mund të bëjnë më shumë gjyqtari Besnik e prokurori Isa.
Këta të dy duhen mishëruar, pasi, si edhe shumë të tjerë, marrin rrogën, por nuk japin drejtësi.
Edhe media nuk jep drejtësi, por thotë disa të vërteta.
Dhe, e vërteta për skandalin e inceneratorëve nuk mund të blihet, ashtu siç blihen Arbenët, Damianët, Alqit e politikës apo Besnikët e Isa-të e gjyqësorit.
