Drejtori i Përgjithshëm i Policisë së Shtetit, Gledis Nano, urdhëron vartësit e tij në strukturat e policisë që t´i nënshtrohen tetstit të drogës.
Nga raportimet mësohet se testet kanë nisur të kryhen prej ditës së sotme në repartin e toksikologjisë pranë Institutit të Mjekësisë Ligjore, ku punonjësit e policisë, pavarësisht gradave që kanë do ti nënshtrohen analizave për të parë nëse janë ose jo përdorues të substancave narkotike, kanë ose jo varësi prej tyre.
Nuk dihet procedura që do të ndiqet dhe si përcaktohen punonjësit që do t´i nënshtrohen testeve.
Pak kohë më parë mjeku toksikolog Alert Drishti shpjegonte procedurat që ndiqeshin në rastin e testeve të tilla.
“Ka dy lloj analizash, njëra quhet cilësore dhe tjetra sasiore. Në klinikën tonë përdoren ato cilësore, nëse je apo jo përdorues pa përcaktuar përqëndrimin e substancës në trup. Këto bëhen përgjithësisht me anë të urinës ku konfirmohet ke ose jo përmbajtje të substancës. Përqëndrimi i tyre në gjak, që bëhet nga Instituti i Mjekësisë Ligjore merret në gjak kryesisht për anën ligjore. Këtu shumë rallë përdorim testin e gjakut, përgjithësisht bëhet testi i shpejtë. Substanca më e vështirë për t’u larguar nga gjaku varet shumë nga dieta që përdor pacienti, sa më e lëngshme dhe e ujshme të jetë, rritet jashtëqitja e urinës dhe koha shkurtohet. Mund të jetë e vlefshme për një javë pas përdorimit. Kokaina mund të largohet më shpejt, ndërsa heroina më vonë. Por ka rëndësi edhe rruga e marrjes. Marrjet në rrugë që vonojnë përthithjen zgjasin edhe kohën e qëndrimit në trup.
Ata që nuk janë përdorues të rregullt, largimi i substancës shkon maksimumi një javë. Përdoruesi i rregullt mesatarisht supozojmë njëherë në ditë, nëse bën testin e shpejtë del rezultati më shpejt. Testi nuk tregon nëse je i rregullt apo jo por nëse ke apo jo substance narkotikësh në organizëm.
Nëse testi bëhet atë ditë apo dy-tre ditë më vonë del si përdorues, por nuk mund të dalë pas një muaji fjala bie. Një ndër ato që qëndron më gjatë në organizëm është një lloj morfine. Nëse do flasim për drogërat e shpeshta që përdoren më e shpejta është kokaina dhe më e ngadalta është heroina, por gjithmonë varet nga rruga e marrjes dhe dieta e pacientit”, tha Drishti.
