Me barazimin ndaj Laçit, Partizani ka mbyllur fazën e parë të kampionatit në mënyrën më të keqe të mundshme. Të kuqtë pretendentë për titull në fillimin e sezonit nuk kanë treguar një objektiv të tillë në 9 sfidat e para, duke qene shumë larg pritshmërive.
Skuadra e drejtuar nga Ilir Daja numëron 9 pikë në tabelën e renditjes, duke qenë shumë pranë zonës së ftohtë. Kjo ka bërë që pozitat e trajnerit të mos jenë komode, edhe pse nga kryesia konfirmohet prezenca e tij në stol.
Partizani mund të konsiderohet edhe si skuadra e barazimeve, pasi ka shënuar vetëm një fitore deri në këtë pikë të sezonit, atë ndaj Kastriotit dhe në plot 6 sfida të tjera kanë ndarë pikët me kundërshtarin. Një ecuri që nuk ishte menduar aspak nga drejtuesit e lartë të klubit, aq më pak nga trajneri Daja dhe stafi i tij.
Ndërhyrjet e shumta në merkaton e verës kanë ndikuar negativisht në harmoninë e skuadrës në fushën e lojës, e cila nuk ka arritur të dal për asnjë moment në lojën e saj. Sfida e radhës për Partizanin është ajo e 26 nëntorit ndaj Teutës, aty ku besojnë se do të sjellë edhe kthesën e madhe, me synimin e qartë ngjitjen sa më lart të shkallëve të renditjes.
Distanca me kreun që mbahet nga Tirana është tepër e madhe, plot 11 pikë me bardheblutë që kanë edhe një ndeshje për të luajtur, pikërisht atë të kësaj të hëne ndaj ndjekësve të Kukësit. Gjithsesi tek Partizani janë optimistë se rezultatet pozitive do të mbërrijnë, së bashku me fatin që nuk është se e kanë pasur gjithmonë në krahun e tyre. /Klan News/
