Partizani vazhdon me sukseset dhe tregon sinjale të mira. Pas ndeshjes ndaj Besëlidhjes, e fituar me shifrat 2-0 në Cërrik nga të kuqtë, që siguroi edhe kualifikimin në fazën tjetër të Kupës, për “Panorama Sport” foli trajneri i “demave”, Ilir Daja.
Ai është i kënaqur me skuadrën, sidomos në pjesën e dytë. Rikthimi i Zhuniorit te goli është gjithashtu një sinjal i mirë, sipas teknikut. Në fund trajneri flet edhe për ndeshjen e ardhshme ndaj Laçit të shtunën, ku do kërkohet me patjetër triumfi, për të vazhduar sukseset dhe provuar ngjitjen në vendet e para të tabelës së Superiores.
Fituat edhe ndeshjen e dytë dhe u kualifikuat. Si e komentoni këtë ndeshje?
Specifika e Kupës është të marrësh rezultat dhe të shkosh drejt kualifikimit. Kemi bërë edhe rrotacion sot (dje), ku të paktën ata 15-16 lojtarë që do t’i kemi edhe në ndeshjen me Laçin, u aktivizuan. Kemi bërë më mirë në pjesën e dytë sesa në të parën. E rëndësishme është që edhe në këtë ndeshje vazhdojmë ritmin e mirë, duke mbajtur portën e pastër dhe shënuar në sulm. Më vjen mirë që rikthehet Zhunior te goli sepse është sulmuesi ynë kryesor dhe do t’i shërbejë ky gol për zhbllokimin edhe në vazhdimësi.
Ekipi u zhbllokua dhe fitoret po vijnë. U zgjidh problemi i Partizanit?
Kemi ende gjëra për të përmirësuar. Evidente është fryma e mirë e grupit dhe lojtarët. Pavarësisht se vinin nga një avantazh në ndeshjen e parë, nuk e ulën motivimin, por me entuziazëm dhe me kontroll të lojës bënë që të shkojnë te fitorja dhe kualifikimi. Dihet se është objektivi ynë i dytë Kupa dhe tashmë nisin përgatitjet për ndeshjen e së shtunës.
U duk sikur zëvendësimet në pjesën e dytë ju dhanë të njëjtin ritëm. Ishte ky efekt?
Ne i kemi tashmë lojtarët sepse është kthyer Zhunior pas një periudhe gripale që kaloi këtë javë. Është Cara, i cili s’është në kondicionin e vet më të mirë, ju e patë që luajti vetëm rreth 30 minuta, por nga dita në ditë po përmirësohet. Kemi një grup, në të cilin mund të bëjmë rrotacion në mbrojtje dhe mesfushë, por besoj se lojtarët që u aktivizuan bënë mirë. Në këtë grup mund të ndërhyjmë pa prishur manovrën.
Keni një koment për ndeshjen e radhës në Superiore ndaj Laçit të shtunën?
Është ndeshje e vështirë, sepse Laçi vjen nga disa fitore radhazi. Sigurisht që ne e kemi vlerësuar ndeshjen e së shtunës. Të vazhdojmë me këtë ritëm që po luajmë, për të shkuar më pas drejt marrjes së fitores ndaj Laçit./Panoramasport
