Një lidhje dashurie që mund të ketë vazhdim. Ose të paktën kjo është ajo që shpreson Aurelio de Laurentiis.
Sipas të përditshmes italiane “La Repubblica”, presidenti i Napoli-t po mendon t’i ofrojë rinovimin Higuain, protagonisti i madh i këtij sezoni në kampionatin italian. Kontrata aktuale skadon në 2018-ën dhe ka një klauzolë prej 94 milionë eurosh. Ideja është që lojtarit t’i ofrohet një marrëveshje deri në 2020-ën me 7,5 milionë euro në sezon dhe me një klauzolë prej më shumë se 100 milionë eurosh për prishjen e kontratës.
Megjithatë, presidenti i “axurrëve” nuk do ta ketë aspak të lehtë të bindë lojtarin, i cili pëlqehet nga gjysma e Europës. United dhe Bayern janë në krye të listës. Higuain po udhëheq Napoli-n drejt ëndrrës për titullin e tretë në historinë e klubit. Paraqitjet e jashtëzakonshme kanë tërhequr vëmendjen e “big”-ëve të Europës. Në ditët e kaluara ka dalë edhe një lajm në lidhje me një takim të supozuar mes tij dhe Jose Mourinho, i cili do të marrë drejtimin e Manchester United duke filluar nga qershori i ardhshëm.
Por në listën e pretendentëve është e Bayern Munich: Lewandowski mund të transferohet te Real Madrid dhe për këtë arsye Carlo Ancelotti është vënë në kërkim të zëvendësuesit të duhur. Pas Higuain, vijnë Bacca dhe Ibrahimovic. Në fund, nuk mund të përjashtohet as Chelsea, me Antonio Conte që po e ndjek me vëmendje zhvillimin e situatës te Napoli.
