Armand Dumani, 26 vjeç (personi në foto) ishte viktima e dytë e mbetur nga atentati i mbrëmjes së djeshme në zonën e Astirit, në kryeqytet.
Erigers Mihasi dhe Armand Dumani, u qëlluan me breshëri kallashnikovi, teksa ishin duke lëvizur me makinën tip “Audi” A7 të Erigers Mihasit, në zonën e njohur si “dy rotondot”, në “Astir”.
Pas krimit, një makinë e djegur u gjet në Thumanë, që dyshohet të jete përdorur nga autorët, të cilët më pas kanë humbur gjurmët, duke përdorur një tjetër automjet. Dy armë zjarri automatike u gjetën në mjet që rezulton i vjedhur dhe me targa po ashtu të vjedhura.
Dyshohet se autorët që ekzekutuan Dumanin e Mihasin janë një grup personash që operojnë me pagesë, që besohet se e kanë mirëplanifikuar vrasjen, duke ndjekur prej kohësh shënjestrën dhe u koordinuar me njeri-tjetrin për lëvizjet e tyre.
Dyshimet për krimin janë se kemi të bëjmë me larje hesapesh, duke qenë se dy viktimat rezultojnë persona të përfshirë e të dyshuar në disa ngjarje kriminale.
