Shoqatat e mjekëve do t’i dorëzojë të hënën ministrit të Shëndetësisë, Ilir Beqaj, propozimet konkrete për ndryshimin e nenit 96 të kodit penal. Në takim do të jenë edhe përfaqësues të Urdhrit të Mjekut dhe ekspertë të drejtësisë.
Prof.Dr. Arjan Harxhi i cili drejton shoqatën e mjekëve infeksionistë thotë se mjekët nuk duhet të dënohen me burg në rastet e gabimit, apo një fatkeqësie që mund t’i ndodhë gjatë ushtrimit të detyrës së tyre.
“Ka masa të tjera ndëshkuese për mjekun siç mund të jetë gjoba apo sanksione të tjera të përcaktuara si kompetencë e Urdhrit të Mjekut. Gabimet e mjekëve nuk duhen trajtuar si vepër penale, por si çështje civile, ashtu sikurse ndodh dhe me homologët tanë më perëndim”, shprehet Harxhi.
Në 23 nëntor, shoqatat e mjekëve iu drejtuan me një letër të gjithë institucioneve të larta drejtuese në vend ku kërkonin ndryshime në kodin penal të nenit 96.
