Edi Paloka, kryetari i Këshillit Kombëtar të Partisë Demokratike, konfirmoi këtë të Premte se në zyrën e tij janë dorëzuar 4200 firma për mbledhjen e Kuvendit Kombëtar të Partisë PD.
Ndryshe nga sa shprehet Sekretari i PD-së Gazmend Bardhi, se firmat duhet të dorëzohen në zyrën e protokollit të Partisë Demokratike, në mënyrë që të verifikohen e të nisin procedurat për thirrjen e Kuvendit Kombëtar, Paloka mendon ndryshe. Ai thotë se firmat verifikohen nga komisioni i mandateve në nisje të Kuvendit Kombëtar të PD-së, që është lajmëruar më 11 Dhjetor.
“Janë 4200 të dorëzuar atë ditë që u bënë publike. Kanë ardhur dhe formularë të tjerë, janë formularë të plotësuar nga delegatët, që janë delegatë të Kuvendit të PD-së të përcaktuar siç i përcakton statuti. Janë të gjitha të dhënat, emër, mbiemër, emri i babës, numri i kartës dhe funksioni në parti që i bën delegatë. Mund ti verifikoni”, tha Paloka për gazetarët nga zyra e tij në PD.
“Verifikimet i bën komisioni i mandatave në Kuvend. Ky verifikim do bëhet dhe në këtë Kuvend që është i jashtëzakonshëm, atë ditë para se të nisë kuvendi. Dikush thotë që janë të falsifikuara apo marrë me zor. Kam dëgjuar lloj-lloj historish, por këto verifikohen nga komisioni i mandateve të nisje të Kuvendit”, shtoi ai.
I pyetur lidhur me deklaratat e bëra nga Basha e Bardhi se nuk do të ketë Kuvend, Paloka tha: “Nëse s’respektoni vullnetin e shumicës së delegatëve kjo është përgjegjësi më e madhe. Nëse pretendohet se nuk janë firma reale, hajde verifikojini”.
