Qëndrimi ndaj “Foltores” së ish-Kryeministrit duket se ka nxjerrë në pah një ndarje të qëndrimeve të Ambasadorëve të akredituar në Tiranë.
E ndërsa ambasadorja amerikan, Yuri Kim, ka zgjedhur një pozicionim kundër “Foltores” referuar deklaratave publike, kolegët e saj të Gjermanisë dhe Francës, dy vendet kryesore të Bashkimit Europian, kanë vendosur të qëndrojnë neutralë lidhur me zhvillimet në partinë më të madhe të opozitës.
Ambasadorja franceze Christine Vasak dhe ambasadori Gjerman, Peter Zingraf gjatë një aktiviteti në Korçë u pyetën nga mediat lidhur me “Foltoren” dhe rolin e ish-Kryeministrit Berisha, ndërsa përgjigjet e tyre shmangën totalisht pyetjen, duke përqëndruar vëmendjen te proceset integruese
“Çështja që më shqetëson më tepër kryesisht në këtë moment është që ne të arrijmë të organizojmë konferencën e parë ndërqeveritare për Shqipërinë dhe Maqedoninë e Veriut natyrisht me urimin më të madh që ajo të bëhet gjatë presidencës sllovene pra së shpejti dhe duke pritur gjithashtu edhe përfundimin e zgjedhjeve në Bullgari ashtu siç i tha dhe kryeministri i Holandës i cili ishte në Shqipëri dje’, u shpreh ambasadorja e Francës.
“Unë do të nënvizoja ashtu siç tha kancelarja kur ishte në vizitë këtu ne punojmë të gjithë së bashku me partneritete në mënyrë që konferenca e parë ndërqeveritare për Shqipërinë dhe Maqedoninë e Veriut të mund të realizohet brenda presidencës Sllovene dhe të jeni të sigurtë që në të gjithë po punojmë në këtë drejtim dhe shpresojmë që të bëhet”, theksoi ambasadori i gjerman në Tiranë.
