Ekstradohet drejt Italisë, Julian Mandija, trafikanti shqiptar i drogës, i cili u arrestua muaj më parë në Durrës, ku punonte si doganier.
Nga raportimet mësohet se Mandija mbërriti në aeroportin e Fiumicino-s, i shoqëruar nga Interpol mëngjesin e djeshëm dhe tashmë ndodhet në një burg në Lazio.
Trafikanti shqiptar u kap në Durrës, teksa po shkonte në punë në port ku punonte si doganier, ndonëse shteti italian e kishte shpallur në kërkim ndërkombëtar.
Prokurori publik i L’Aquila kishte kërkuar 7 vjet e 4 muaj burg për Mandijën në vitin 2015. Shqiptari me origjinë nga Durrësi që jetonte në provincën e Pordenones në Itali ishte kthyer në Shqipëri.
Ai akuzohet nga autoritetet italiane se kishte ndërtuar një rrjet të trafikut ndërkombëtar të kokainës mes Shqipërisë dhe Italisë që prej vitit 2002. Ai bashkëpunonte me drejtues të grupeve kriminale për prodhimin, trafikimin dhe mbajtjen e lëndëve narkotike, të ndarë në disa zona, kryesisht në bregdetin e Marche dhe Bologna.
Njësitë hetimore me përdorimin e teknologjive të avancuara, fillimisht lokalizuan zonën ku lëvizte Mandija për të organizuar më pas operacionin për arrestimin e tij, në Durrës, ku punonte si doganier.
