Myrto Uzuni ka lënë pas krahëve formën e dobët që kushtëzoi paraqitjet e tij një muaj më parë dhe tani po gjen me një rregullsi të admirueshme rrjetën.
Sot, ai ka shënuar në takimin e katërt radhazi në të gjithë kompeticionet, duke u konfirmuar në një formë të lartë.
Skuadra kampione në fuqi e Hungarisë ndeshej sot me Kisvardën e cila në javët e para të edicionit kishte çuditur të gjithë duke krijuar një shkëputje.
Ekipi vendas ku luante titullar Herdi Prenga, me Asanin në stol, i bëri rezistencë kampionëve. Prenga gjeti edhe golin, por ai iu anulua me një vendim të diskutueshëm të VAR në fundin e pjesës së parë.
Në pjesën e dytë, kartoni i kuq i Mateus për Kisvardën i dha mundësinë Ferencvaroshit të dominonte dhe nisi spektakli i Uzunit, i cili shënoi dy gola shumë të bukur në minutat 70 dhe 90, ndërsa edhe goli i Marin dërgoi rezultatin përfundimtar në 4-0 për Ferencvarosh, që kthehet në vendin e parë.
