Ish-kryeministri Sali Berisha akuzoi këtë të Premte kreun e qeverisë Edi Ramën për shtim të borxhit të vendit në kurriz të qytetarëve. Nga “Foltorja e Lushnjes”, Berisha hodhi akuza dhe ndaj opozitës, lidhur me qëndrimin ndaj Eurobondit.
“A e mendoni ju që një opozitë e vërtetë një borxh 700 milionë euro ta abstenojë, madje edhe ta votojnë në komisione?! Ndërkohë ministrat vjedhin dhe në gjumë. Në 2015-ën ne braktisëm parlamentin nga borxhi që mori Rama se ai borxh do vidhej e vetëm do vidhej”, tha Berisha.
Lulzim Bashën e quajti “të fikur”, “ish-kryetar” dhe “kryetar pa parti”.
“Si njeri i fikur që je s’mund të ndezësh shpresë as te vetja jote. Ish-kryetari apo kryetari pa parti eci tetë vite nga disfata në disfatë”, tha Berisha.
Ish-kryeministri e akuzoi po ashtu Bashën se nuk arriti të mbronte votat në zgjedhjet e fundit parlamentare.
“Sot në vend të luftës për masakrën elektorale ka marrëveshje për ta bërë partinë ministri të narkoshtetit”, tha Berisha.
“A vjen ai dot te ju?! S’vjen dot. Ai është peng i Ramës, si mund ta përmbysë atë”, u shpreh ish-kryeministri.
