Gjykata Kushtetuese vendosi sot që të rrëzonte kërkesën e opozitës, duke shpallur ligjshëm procesin e zgjedhjeve lokale të 30 Qershorit, që u bojkotuan nga PD-LSI.
Kushtetuesja, dy ditë më parë mori në shqyrtim kërkesën lidhur me ligjshmërinë e zgjedhjeve, ndërsa Komisioni i Venecias kishte shpallur opinionin e tij, duke legjitimuar procesin.
Gjithsesi Voltana Ademi, kryebashkiake e Shkodrës, dhe juristi Jordan Daci, pas seancës u shprehën optimistë se nga vendimi i Kushtetueses nuk do të kishte të humbur, por do të fitonte demokracia.
Në fakt Kushtetuesja vendosi të rrëzojë ankimimin mbi zgjedhjet lokale dhe të legjitimojë procesin.
Por cilat do të jenë hapat që do të ndiqen nga opozita?
Voltana Ademi paralajmëroi dy ditë më parë se do ti drejtohej edhe Gjykatës së Strasburgut lidhur me procesin mono-partiak.
“Ne pretendojmë që ky proces ka qenë ilegjitim. Gjykata nëse do marrë një vendim, do marrë një vendim të qartë. Nëse s’jemi të kënaqur me vendimin do shkojmë në Strasburg. Nëse Kushtetuesja s’e merr fare në konsideratë të marrë një vendim në këtë rast bëhet e vështirë për të shkuar në Strasburg. Kur e kam bërë kërkesën kam shpresuar të kishim një gjykatë funksionale”, paralajmëroi Ademi.
