Një sasi prej rreth 100 kg kanabis është sekuestruar nga policia e Shkodrës që ka arrestuar katër persona.
Aksioni i koduar “Bzheta” erdhi pas hetimeve disamujore nga policia e Shkodrës dhe prokuroria e rrethit.
Në pranga u vunë: Prel Zefi, 30 vjeç, Albert Logu, 21 vjeç, të dy banues në Shtoj i Ri, Pllum Fusha, 37 vjeç, banues në Grudë e Re dhe Besnik Bludaj, 40 vjeç, banues në Vrak, Malësi e Madhe.
“Specialistët e Seksionit për Hetimin e Krimeve kundër Trafiqeve të Paligjshme dhe Narkotikëve kishin marrë informacione se këta shtetas po e transportonin lëndën narkotike nga Malësia e Dukagjinit në drejtim të Shkodrës. Bazuar në këto informacione, në vendin e quajtur Bzhetë, në Njësinë Administrative Shkrel, shërbimet e Policisë kanë ndaluar tre automjete që drejtoheshin nga shtetasit Besnik Bludaj, Prel Zefi dhe Pllum Fusha. Në automjetin që drejtohej nga Pllum Fusha ishte pasagjer Albert Logu. Gjatë kontrollit në brendësi të automjetit tip furgon me drejtues Prel Zefin, shërbimet e Policisë gjatën dhe sekuestruan në cilësinë e provës materiale 96 kilogramë e 500 gramë lëndë narkotike cannabis sativa. Në cilësinë e provës materiale u sekuestruan lënda narkotike, 8 aparate celular dhe 3 automjete”, njoftoi policia këtë të Mërkurë.
Materialet procedurale i kaluan për ndjekje të mëtejshme, Prokurorisë pranë Gjykatës së Shkallës së Parë Shkodër, për veprat penale “Prodhimi dhe shitja e narkotikëve” dhe “Pastrimi i produkteve të veprës penale ose veprimtarisë kriminale”, shtuan të njëjtat burime.
