Data 1 nëntor ka nisur me radhë të gjata qytetarësh nëpër pikat e shitjes së aboneve. Pas njoftimit të Bashkisë së Tiranës për rregullat e reja, në të gjitha pikat e shitjes së aboneve ka bipopullim dhe radhë të gjata të qytetarëve, të cilët për të marrë abonenë duhet të plotësojnë letërnjoftimin si dhe të kenë me vete fotografinë.
Në foton e mbërritur në redaksinë e Boldnews.al shihet se si në një nga pikat e shitjes së aboneve janë me dhjetra qytetarë në radhë.
Mëposhtë keni njoftimin e Bashkisë së Tiranës për rregullat e reja:
Informojmë qytetarët se mbështetur në kuadrin ligjor në fushën e transportit për shpërndarjen dhe pajisjen e udhëtarëve të transportit publik qytetës me bileta të pajtimit mujor (abone), sipas Udhëzimit të Ministrisë së Infrastrukturës dhe Energjisë nr. 3743, datë 10.7.2017 “Mbi modelet dhe standardet e biletave të transportit rrugor të udhëtarëve, të ndryshuar), pajisja me bileta të pajtimit mujor (abone) të përgjithshme dhe linje bëhet e shoqëruar me foto dhe plotësohet me emrin dhe mbiemrin e mbajtësit. Pikat e shitjes së aboneve të përgjithshme ndodhen te kioskat pranë stacioneve të autobusit.
Për t’u ardhur në ndihmë studentëve, Bashkia bën të ditur dije se pajisja me Kartelën e Pajtimit Mujor (Abone Studenti) bëhet në pikat e hapura posaçërisht, sikurse janë: kioska tek “Ushtari Panjohur”, rruga “Ludovik Shllaku”; kioska tek 9-katëshet, rruga “Barrikadave”; kioska tek ish-7 Xhuxhat, rruga “Elbasanit”, si dhe kioska pranë Inxhinierisë së Ndërtimit, rruga “Muhamed Gjollesha”.
