Njëmbëdhjetë persona janë arrestuar nga policia që ka zbuluar tre ndërtime pa leje në Palasë, ndërsa ka shpallur në kërkim investitorin.
Personat e vënë në pranga janë punonjës në objektet që po ndërtoheshin. Po ashtu, janë proceduar edhe 2 specialistë të IMT-së, për veprën penale “Shpërdorimi i detyrës”.
Policia njoftoi se bazuar në informacionet e marra se në fshatin Palasë po kryheshin ndërtime pa leje, kanë ushtruar kontroll për verifikimin e informacionit dhe kanë konstatuar ndërtimin e tri objekteve pa leje.
Si rezultat, u bë arrestimi në flagrancë për veprën penale “Dhënie ndihmë për ndërtim të paligjshëm” e kryer në bashkëpunim, i shtetasve: F.B., 59 vjeç, banues në Ksamil, A. S., 32 vjeç, B. Zh., 26 vjeç, M.Zh., 34 vjeç, V. B., 49 vjeç, D. T., 44 vjeç dhe L. T., 38 banues në Vlorë, A. P., 44 vjeç, O. H., 22 vjeç, banues në Krujë, R. Sh., 34 vjeç dhe E. S., 37 vjeç banues në Tiranë.
Në vijim të veprimeve u bë dhe shpallja në kërkim policor për veprën penale “Ndërtimi i paligjshëm”, e shtetasit V.GJ., 32 vjeç, banues në Himarë, investitori i ndërtimeve.
Nga hetimet e kryera, dyshohet se këta shtetas, të punësuar nga shtetasi V.GJ., po kryenin punime për ndërtimin e tri objekteve, në fshatin Palasë, Himarë.
Gjithashtu, nga specialistët për Hetimin e Krimit Ekonomik-Financiar në DVP Vlorë u proceduan në gjendje të lirë shtetasit R.H., 35 vjeç dhe E.Z., 30 vjeç, banues në Himarë, me detyrë specialist pranë Inspektoratit të Mbrojtjes së Territorit të Bashkisë Himarë, pasi dyshohen se nuk kanë kryer kontrolle të vazhdueshme për ndërtimet në territorin e kësaj bashkie.
Vijon puna për kapjen e shtetasit V.Gj. dhe vënien e tij para përgjegjësisë ligjore, ndërsa materialet në ngarkim të tyre i kaluan Prokurorisë së Rrethit Gjyqësor Vlorë, për veprime të mëtejshme, njoftoi policia.
