Në Kuvend vijojnë replikat dhe batutat mes Kryeministrit Edi Rama dhe kreut të PD, Lulzim Basha. Rama duke iu drejtuar Bashës i tha se “respekto që të të respektojnë. Po shfaqesh këtu si trimi i madh pa shokë shumë, që të tjerët janë frikacakët që nuk përballen dot me këtë trimin”.
“Këto dokrrat e tua me trimëri, e me ndershmëri e me pathyeshmëri, tregoja vetes. Je bërë si Beni që ecën vetë, që natën ecën vetë në pyll dhe këndon që ti dali frika. Të lutem, mos u bëj si Beni. Ti ke probleme jo vetëm me shifrat, por edhe me emrat, ti vetëm improvizon në politikë.
Ne nuk mund t’i hyjmë ndryshimeve Kushtetuese pa hyrë në diskutime mes përfaqësuesve tanë dhe të Partisë Demokratike. Mos fol përçart me kafshime o Lulzim, thuaja vetes ato kafshimet, po jo këtu se këtu të shohin të gjithë. E dimë që ke pasur një aleat që të kafshonte”, tha Rama.
Në vijim, Rama i tha se “me ultimatume nuk mund të vish në Kuvend dhe të na detyrosh të të miratojmë ty nismat që sjell. Ti ke frikë të hysh nga përpara selisë tënde se nuk e di nëse të del ndonjë foltore përpara, vjen e na bën trimin këtu”.
