Partia Demokratike ka dorëzuar në Gjykatën Kushtetuese këtë të Hënë padinë për mos ngritjen e Komisionit Hetimor për çështjen “Becchetti”. Sipas PD, ngritja e komisionit po pengohet nga mazhoranca.
Padia u dorëzua nga nënkryetarja e PD-së, Grida Duma dhe Sekretari i Përgjithshëm, Gazment Bardhi.
Padia u paralajmërua të Shtunën gjatë një konference të Lulzim Bashës me gazetarët. Ai tha se Rama po pengon ngritjen e Komisionit Hetimor për Becchetti-n. Po ashtu, shtoi se vendimi për çështjen Becchetti është në internet dhe nuk ka asgjë konfidenciale siç ka deklaruar Rama.
“Fitorja e parë e PD është fakti që ata treguan publikisht që ata s’miratojnë dot një komision se është një çështje e humbur”, tha Duma në një prononcim për gazetarët jashtë gjykatës.
Ajo shtoi se komisionet hetimore mblidhen me ¼ e firmave të deputetëve dhe për ngritjen e komisionit hetimor “Becchetti” s’ka nevojë për aprovimin e mazhorancës.
“120 milionët (që Becchetti fitoi në Arbitrazh ndaj Shqipërisë), ne do luftojmë deri në fund që mos ti paguajnë shqiptarët, por ti paguajnë shkaktarët, Rama and company”, u shpreh Duma.
Gazment Bardhi kujtoi se pasi u bë publik vendimi për këtë çështje, PD depozitoi në SPAK një kallëzim, për vënien para drejtësisë të përgjegjësve.
