Ansu Fati do të qëndrojë gjatë te Barcelona. Të paktën deri në vitin 2027 pasi sulmuesi rinovoi kontratën me klubin katalanas dje ndërsa sot në një konferncë për shtyp në krah të presidentit Laporta shprehu gëzimin e madh për firmën.
Numri 10 i Barcelonës e pranon se është një ëndërr e madhe për të e gjithashtu një përgjegjësi pasi sipas tij gjithmonë do ta “përndjekë” hija e numrit 10, legjendës Lionel Messi.
“Është një nder, kaq shumë kujtime më vijnë në mendje. E gjithë kjo është një ëndërr për mua dhe familjen time, është emocionuese të vazhdoj historinë time me Barçën, atë që kam dashur gjithmonë. Falenderoj klubin për besimin, të cilin unë shpresoj të paguaj. Unë u thashë agjentëve të mi se doja të qëndroja dhe të isha i qetë këtu psikologjikisht, jam i lumtur që ndodhi. Ndihem i dashur këtu dhe i vlerësuar dhe ky është një nga elementët më të rëndësishëm, që nga momenti i parë që kam shkelur në La Masia, ku dua të jem, i motivuar dhe i lumtur”.
Fati ka një mesazh për tifozët në El Clasico ndërsa përsërit se askush nuk do ta zëvendësojë Messin dhe atë që ka bërë ai te Barça.
“Mbaj mend golin tim të parë kundër Osasuna sikur të ishte dje, por në këto dy vjet ka pasur shumë momente të mira. Më emocionuese është ai i seancës së parë stërvitore: ishte një surprizë, isha 16 vjeç dhe nuk mund ta besoja. Pastaj ishte gjithashtu e bukur dita kur u ktheva në fushë pas dëmtimit të rëndë, përqafimi i njerëzve të mi ishte spektakolar. Numri 10 mbi supe? Ajo peshon shumë dhe ata do të më vlerësojnë për të, por në kokën time e di se çfarë mund të bëj nuk e ndiej presionin për shkak të historisë me Mesin, jam I qetë. Askush nuk do të jetë kurrë si Messi, unë duhet të shkoj në rrugën time. Sfida ndaj Realit? Ajo është rivalja jonë e madhe, do të luajmë në shtëpi dhe shpresoj se ky është një faktor. Ne do të japim gjithçka, ne jemi Barça dhe na kërkohet të fitojmë gjithçka “, përfundoi talenti i madh i katalanasve.
