Nga Boldnews.al
As alkool, as drogë, as gjurmë të dukshme helmimi. As sasi e tepruar klori dhe as toksikim nga gaz apo tym, për aq sa është kontrolluar deri më tani.
Çfarë e shkaktoi vdekjen e 4 turistëve rusë në pishinën dimërorë të “Gloria Palace”, në Qerret të Kavajës, mbrëmjen e 15 Tetorit 2021?
Grupi hetimor nuk është në gjendje të japë asnjë përgjigje të saktë, edhe pse kanë kaluar më shumë se 5 ditë, ndërkohë që velloja e misterit po bëhet gjithnjë e më e trashë mbi fatin tragjik të bashkëshortëve Sergei dhe Natalia Burenkov, vajzës së tyre Ekaterina dhe të dashurit të saj, Nikita Belousov.
E gjithë situata po u jep një dorë të mirë edhe teorive konspirative, për përdorimin e lëndëve helmuese “nga ato që gjenden në Rusi”.
Deri më tani, këto variantet konspirative nuk janë vlerësuar nga grupi hetimor.
Prokurorët dhe oficerët e Policisë Gjyqësore në Kavajë shpresojnë të gjejnë shkakun e vdekjes së 4 rusëve në përgjigjet e të gjithë analizave të kërkuara.
Por kjo pritshmëri po zbehet dita-ditës.
Cilësia e aparaturave të Mjekësisë Ligjore është e ulët, shumë më e ulët se sa ajo e ekspertëve që punojnë me to.
Gjithçka dihet deri më tani, bazuar në autopsinë paraprake të rusëve fatkeqë, është që ata nuk kanë konsumuar alkool apo lëndë narkotike.
Po ashtu, duket se ekspertët përjashtojnë helmimin nga ushqimi.
Autopsia nuk ka identifikuar lënde helmuese.
Për më tepër, hetuesit kanë rindërtuar itenerarin dhe vaktet e përdorura nga 4 rusët gjatë ditës së Premte.
Ata janë ushqyer në mënyrë të njëjtë edhe me 6 persona të tjerë, të cilët ishin pjesë e udhëtimit turistik nga Qerreti i Kavajës, në drejtim të Ohrit, në Maqedoni.
Asnjë prej bashkëudhëtarëve të tyre nuk ka pasur as shqetësimin më të vogël nga ushqimet e konsumuara gjatë shëtitjes që nisi në orën 6.30 të mëngjesit e përfundoi rreth orës 20.00 të mbrëmjes.
Grupi hetimor po pret rezultatet e cilësisë dhe sasisë së klorit të përdorur në pishinën dimërore të “Gloria Palace”, ku u gjetën të shtrirë të pajetë, ndërkohë që, siç e konstatuan në vetë të parë oficerët e Policisë Gjyqësore dhe zyrtarët e lartë të uniformave blu, sistemi i aspirimit në pishinën e mbyllur duket se ka funksionuar në rregull.
Punonjësi i pastrimit të pishinës ka treguar ritualin e punës së tij për hetuesit. Ai pastron filtrat dhe përdor vetëm një gotë uji klor për pishinën me ujë të ngrohtë.
Gjatë verës ai e kryen të njëjtin pastrim çdo ditë, ndërsa tashmë ai e ka kryer dy herë në javë, për shkak të numri të pakët të klientëve që e përdorin jashtë sezonit turistik.
Pastruesi 60-vjeçar thotë që nuk përdor solucione të tjera për pastrimin e pishinës. Ai e ka pastruar mëngjesin e së Premtes, pasi ishte njoftuar që ambjenti shlodhës do të përdorej në mbrëmjet nga familja ruse.
Stafi i hotelit, i cili është marrë me përgatitjen e pishinës, nuk ka dalluar asnjë anomali, si në aspirim apo edhe erë të mundshme mbytëse e helmuese.
Kjo gjë është konstatuar edhe nga vetë oficerët e Policisë Gjyqësore që kanë qëndruar për mbi dy orë në ambjentin e mbyllur, në katin 0 të hotel “Gloria”
Ata nuk kanë parë të hyjë njeri tjetër në pishinë, përveçse 4 turistëve rusë, të cilët kanë kërkuar momente intime.
Pishina dimërore është hapësirë privacie dhe nuk ka kamera sigurie, të cilat mund të ndihmonin hetuesit për të kuptuar se si turistët arritën njëkohësisht në pikën e vdekjes.
Tashmë, duket se grupi hetimor po kërkon opinione alternative tek ekspertë të lëndëve helmuese. Në këtë moment, çdo ndihmë e kësaj natyre, mund të jetë e vlefshme për hetimin.
