Deputetët e Partisë Socialiste nuk u paraqitën në mbledhjen e sotme të komisionit hetimor për zgjedhjet, që u shty për të Premten për shkak të mungesës së kourumit.
Veprimi i ligjëvënësve të mazhorancës u dënua nga kolegët e opozitës.
“Bojkoti i Komisionit Hetimor për masakrën zgjedhore të 25 Prillit nga anëtarët e Partisë Socialiste është dëshmi e qartë e papërgjegjshmërisë së tyre në raport me interesin e qytetarëve. Edhe pse kërkuar vetë që mbledhja e Komisionit të vijonte në datën 20, sot zgjodhën bojkotin. Është e qartë që ato që vodhën zgjedhjet, përdorën krimin dhe paratë e korrupsionit për të blerë vota, që përdorën shtetin në zgjedhje, nuk kanë interes për të faktuar masakrën zgjedhore. Opozitën nuk e pengojnë dot në ushtrimin e të drejtave dhe përgjegjësive të saj për hetimin parlamentar të masakrës zgjedhore të 25 Prillit”, shkroi sekretari i PD-së, Gazmend Bardhi në një reagim në rrjetet sociale.
Ndërsa deputeti i LSI-së Petrit Vasili, në një postim po në rrjetet sociale, shkroi: Çfare turpi! Rilindja bojkoton pa asnje shkak e arsye mbledhjen e Komisionit Hetimor per zbardhjen e zgjedhjeve te 25 prillit! Mbledhjen e kerkuan po vete per sot ne 20 tetor! Pengojne dhe zvarritin me cdo mjet zbardhjen e 25 prillit. Kane shume frike nga e verteta!
