Ambasadori i BE-së, Luigi Soreca u shfaq këtë të Mërkurë krah kryeministrit Edi Rama në një konferencë për mediat ku u fol për progres-raportin e BE-së, bërë publik një ditë më parë.
Soreca bëri apel që konferenca ndërqeveritare të mblidhet sa më shpejt dhe shtoi se se vonesat në çeljet e negociatave do të kenë një ndikim negativ për besueshmërinë e BE-së.
“Raporti konfirmon që Shqipëria i ka përmbushur kushtet që ishin përcaktuar nga Këshilli e ne theksojmë që konferenca e parë ndërqeveritare duhet të mblidhet sa më shpejt të mundur dhe përpara fundit të vitit. Po ndodh punë intensive nga të gjithë udhëheqësit e BE-së për të punuar me shtetet anëtare për të tejkaluar çështjet dypalëshe në mënyrë që kjo gjë të ndodhë sepse shtyrja ose vonesat në lançimin zyrtar do të kenë një ndikim negativ për besueshmërinë e BE-së”, deklaroi Soreca.
