Organizata Politike prezanton kartën sociale, e cila synon nisjen e një fushate kombëtare për realizimin e të drejtave që do t’i jepnin dinjitet punës dhe jetës sonë.
Përmes një postimi në rrjetet sociale, OP thekson se gjendja ekonomiko-shoqërore sa vjen e vështirësohet, rritja e çmimeve shkon bashkë me përkeqësimin e kushteve të punës dhe degradimin e shërbimeve publike.
Sipas OP, në njërën anë shtohet pasuria marramendëse e një klike oligarkësh e pushtetarësh, në anën tjetër varfërohemi të gjithë ne të tjerët.
“Punëtore fasonerie e punëtorë ndërtimi, minatorë e naftëtare, pensionistë e të papuna, studente e të rinj, të vetëpunësuar e profesionistë, gra e burra të sakrificave e aspiratave! Dallimet midis nesh janë shumë të vogla përpara të drejtave të mohuara dhe interesave të përbashkët.
Ne, aktivistët e Organizatës Politike, e konsiderojmë veten si bashkëvuajtës të një sistemi grabitqar dhe ndërlidhës të bashkëqytetarëve në një lëvizje shoqërore që i mungon Shqipërisë.
Prandaj po nisim një fushatë kombëtare për realizimin e të drejtave që do t’i jepnin dinjitet punës dhe jetës sonë.
Hapi i parë do të hidhet të mërkurën, më 20 tetor, në orën 18:00, ku në sallën “UNESCO” të Muzeut Historik Kombëtar do të shtrojmë për diskutim kërkesat e KARTËS SOCIALE dhe mënyrat e organizimit për të vendosur hap pas hapi drejtësinë e munguar shoqërore”, thuhet në njoftimin e Organizatës Politike.
