Kryetarja e Lidhjes Demokratike të Gruas, Albana Vokshi shfrytëzoi një tryezë të organizuar me rastin e tetorit si muaj i ndërgjegjësimit për zbulimin e kancerit të gjirit, për të drejtuar një akuzë për qeverinë dhe apel për gratë shqiptare.
“Në mungesë totale të fushatave të sensibilizimit nga ana e institucioneve shtetërore, është detyrë e secilës prej nesh të bëjmë sa më shumë në këtë drejtim, në mënyrë që gratë dhe vajzat të kenë kontrolle periodike, për parandalimin e kësaj sëmundje që po merr përmasa të tmerrshme. Ndaj sot të gjitha ne mbledhur këtu në këtë sallë, çdo kryetare në strukturat apo komunitetin ku jeton ka një rol të rëndësishëm për të luajtur: të sensibilizojë çdo ditë të tetorit, por edhe çdo ditë të vitit. Mesazhi im për të gjitha gratë sot është: ju lutem kontrollohuni, kryeni testet dhe kontrollet e duhura periodike! Duajeni veten tuaj! Duajeni familjen tuaj! Duajini fëmijët tuaj! Kontrolli shpëton jetë”, u shpreh ajo.
Vokshi nënvizoi se gratë janë forca e ndryshimit.
Sot LDGSH organizoi një takim për forcimin e rolit të gruas në vendimmarrje e politikë. Tryeza ishte organizuar nga fondacioni Suedez Jarl Hjalmarson foundation i partisë simotër “MODERATA”.
