Ndeshjet miqësore janë shumë pozitive për të mbajtur skuadrën në formë dhe për të mos humbur shpirtin e garës, në një periudhë kur kampionati shqiptar është i ndalur për shkak të ndeshjeve të Kombëtares.
Duke pasur parasysh faktin që Partizani kishte dy javë kohë deri në ndeshjen kundër Kukësit në kampionat, menduan të organizonin një test miqësor kundër Turbinës dy ditë më parë. Trajneri i “demave”, Ilir Daja, nuk i kurseu titullarët për këtë sfidë dhe aktivizoi të gjithë lojtarët më të mirë që kishte në dispozicion.
Një ndër titullarët e aktivizuar ishte edhe Stenio Zhunior. Braziliani luajti pjesën e parë në miqësoren kundër Turbinës dhe bëri një sfidë të mirë, por nuk e ka mbyllur takimin pa probleme fizike. Zhunior ka një problem në këmbë që i shkakton dhimbje sa herë që gjuan topin me forcë. Gjatë 24 orëve paraardhëse, te Partizani ishin në ankth për gjendjen e sulmuesit, deri sa ditën e djeshme, braziliani ka kontaktuar me mjekët e ekipit dhe për fatin e mirë, nuk ka asgjë serioze. Stenio Zhunior pritet që nga java e ardhshme të jetë në gjendje optimale.
Ndryshe nga Zhuniori, që u dëmtua në miqësore, mesfushori dhe organizatori i ekipit, Ergys Kaçe, ka disa ditë që nuk është në gjendjen më të mirë fizike. Tri ditët e fundit, 28- vjeçari është stërvitur i diferencuar dhe pritet që vetëm ditën e hënë të jetë rikuperuar plotësisht nga problemi në gju. Zhunior dhe Kaçe kanë qenë pa diskutim dy lojtarët më të rëndësishëm të Partizanit në këtë fillim sezoni.
Sa i takon Emiljano Mustës, dëmtimi është më i lehtë. Mbrojtësi i majtë ka marrë një goditje në brinjë gjatë stërvitjes dhe për të mos rrezikuar, nuk është grumbulluar për ndeshjen me Turbinën dhe është lënë pushim edhe për një ditë tjetër. Por, edhe Musta pritet të jetë 100% gati fillimin e javës së ardhshme, kur Partizani do të kenë dy sfida. Fillimisht, “demat” do të luajnë ndeshjen e kthimit kundër Tërbunit në Kupën e Shqipërisë (kanë fituar 0-3 në ndeshjen e parë), si dhe më pas kundër Kukësit në fundjavë, një sfidë ku pa dyshim do të kërkohet fitorja e parë në kampionat nga të kuqtë.
