Një 25-vjeçar shqiptar ka mbetur i plagosur rëndë pas një konflikti masiv që ndodhi në Hamburg të Gjermanisë. Mediat gjermane raportojnë se shqiptari u gjet nga policia buzë rrugës me plagë të shkaktuara nga goditjet me thikë në kokë dhe shpinë.
Konflikti nisi mes disa të rinjve, të cilët po festonin me barbekju, në një zonë pas një bordelloje.
Rreth orës 18:00 dëshmitarët okularë telefonuan të tmerruar policinë.
“20 djem po zihen,” thanë ata.
Gjashtë makina policie arritën në vendin e ngjarjes, por të rinjtë u larguan, disa u futën në bordello, të tjerë ia mbathën.
Sipas BILD, i plagosuri është në rrezik për jetën.
Pesë persona janë arrestuar për ngjarjen. Një prej tyre, rumun 21-vjeçar mendohet se është i dyshuari kryesor. Shkaqet e sherrit mbeten të paqarta.
