Partia Demokratike ka përshëndetur deklaratën e përbashkët të partive shqiptare në Maqedoni.
Përmes një deklarate për shtyp selia blu e cilëson këtë si një akt përbashkues, i cili sipas demokratëve duhet të shërbejë si orientim strategjik në qasjen faktorit politik shqiptar kudo ndodhet.
“Ky është një lajm i mirë dhe inkurajues për avancimin e të drejtave të shqiptarëve në këtë vend.
Bashkimi dhe bashkërendimi mbi bazën e parimeve dhe qendrimeve demokratike dhe integruese duhet të përbëjë një orientim strategjik në qasjen faktorit politik shqiptar kudo ndodhet.
Partia Demokratike duke shprehur mbështetjen e plotë për këtë akt përbashkues, garanton se si sot në opozitë edhe nesër në qeverisjen e vendit, do ta shndërrojë përbashkimin dhe bashkërendimin e faktorit shqiptar në aksin kryesor strategjik të komunikimit dhe punës për realizimin e interesave integruese të shqiptarëve në Ballkan” thuhet në deklaratën e shpërndarë me email të selisë blu.
