Tensionohet situata në Egje mes Greqisë dhe Turqisë. Shkak është bërë sërisht kërkimi i gazit në zonë. Nga raportimet mediatike mësohet se anija greke e kërkimit “Nautical Geo” ka nxitur reagimin e turqve, por dy vendet akuzojnë njëra-tjetrën për tensionimet.
Autoritetet greke publikuan një NAVTEX në 29 shtator duke njoftuar itinerarin e anijes “Nautical Geo”, por reagimi i turqve erdhi vetëm mbrëmë kur anija u fut në zonën që ata e pretendojnë si të tyren.
Mediat turke njoftuan zhvillimet në Egje, ku një numër avionësh u ngritën po ashtu nga bazat e tyre në zonë për të paralajmëruar grekët, kurse një anije ushtarake turke iu afrua anijes “Nautical Geo” duke i kërkuar të largohet nga zona.
Turqia pretendon si Zonë Ekonomike Ekskluzive thuajse të gjithë detin që rrethon Qipron deri në kufi me Egjiptin dhe Libinë.
