Kategoria Superiore e futbollit shqiptar mbyllë sot javën e katërt me dy ndeshje të “zjarrta” që do të luhen të ndara në dy fasha orare.
Në orën 13:45, në stadiumin “Selman Stërmasi” do të luhet takimi Tirana-Laçi. Një sfidë që premton mjaft spektakël, duke parë dhe pretendimet që kanë skuadrat këtë sezon.
Të dyja skuadrat kërkojnë kthesën në këtë takim, pasi bardheblutë nuk fitojnë që nga ndeshja e parë e kampionatit kundër Skënderbeut. Ndërsa skuadra kurbinase ende nuk e ka shijuar suksesin e parë për këtë sezon ku ka marrë një humbje dhe dy barazime.
Ndërsa në orën 16:45 në stadiumin “Elbasan Arena”, do të luhet Kukësi-Teuta në një sfidë që pritet të dhurojë emocione të shumta, pasi përballë vihen dy ekipet më interesante të momentit.
Skuadra verilindore renditet e para në klasifikim ku e ka nisur më së miri këtë kampionat ku ka marrë dy fitore dhe një barazim, ndërsa Teuta, kampione në fuqi e kampionatit, ka marrë një fitore dhe dy barazime.
